Sóknarbrot - Löglegt ofbeldi?

Í vetur hefur borið á því að sóknarmenn sem hafa sótt maður á móti manni hafi tekið "yfirfintu" þannig að olnbogi þeirra hefur farið í andlit varnarmanns og þannig (stór)skaðað viðkomandi varnarmann.  Við sáum þetta nokkrum sinnum á EM þar sem m.a. Karabatic gekk frá tveim Svíum og í úrslitaleiknum tókst einum Dananum að ganga að mestu frá Metletic.  Í engu þessarra tilvika gripu dómararnir inní og virtist það fara framhjá þeim í öllum tilfellum.  Að minnsta kosti einn leikmaður hefur farið illa út úr slíku broti hér á landi í vetur og hefur ekki getað leikið handbolta nú í nokkra mánuði.  Þarna er kominn ný tegund brota sem ekki hefur sést mikið af áður.  Ég er alls ekki að segja að þetta sé gert viljandi en það skiptir í raun ekki máli og það á að refsa sóknarmönnum jafnt sem varnarmönnum fyrir að slá andstæðing í háls eða höfuð með útilokun (rautt spjald) hvort sem það er viljandi eða óviljandi.  Ef um grófa líkamlega árás er að ræða þar sem augljóslega er verið að meiða menn þá skal beita brottvikningu (krossinn).  Ef sami maður er farinn að gera þetta oftar en einu sinni þá er ekki hægt að flokka það sem slys eða óviljaverk og verða dómarar að bregðast við því á viðeigandi hátt.

Athugasemdir

[Kristján Eldjárn Þorgeirsson, 1.2.2008 kl. 18:10]

Að mörgu leyti sammála þér.  Það þarf að fara að taka á þessu þegar sóknarmaður gerir svona í yfirhandarfintunni.  En jafnframt langar mig til þess að spyrja þig um svolítið mál sem ég lenti í einu sinni á Reykjavíkurmótinu fyrir nokkrum árum.  Ég var nýkominn inn á í leik Selfoss og Vals og var í vörn í horninu.  Ég var bara í eðlilegri varnarmannsstellingu og ætlaði mér að standa mína plikt.  Boltinn berst niður í hornið Valsarinn sækir á og ætlar að fara á milli mín og bakvarðarins.  Hornamaðurinn hjá Val hleypur með andlitið á handlegginn á mér og mér er umsvifalaust vikið útaf í 2 mín af því að ég sló hann í andlitið að mati dómarans.  Þar sem ég klárlega sló ekki til hans þá fannst mér þetta líta út fyrir það að Valsarinn væri að reyna að fiska mig útaf sem honum tókst.  Þess vegna langar mig til þess að spyrja hvort það sé bara almennt í reglum að reka útaf fyrir þetta eða eru einhver mörk í reglum sem hægt er að fara eftir þar sem spurningin er um hvort það var slegið eða hlaupið á hendina t.d.?  Spyr bara af forvitni.

Kveðja!

[Guðjón Leifur Sigurðsson, 3.2.2008 kl. 14:42]

Eins og þú lýsir þessu þá hefði ekki átt að vísa þér útaf.  Mönnum er uppálagt að horfa eftir því hvort hendi fer í andlit eða andlit fer í hendi.  Fyrir hið síðarnefnda á ekki að refsa.

Kveðja,

Guðjón L.