Félögin og dómarauppeldi

Samkvæmt reglugerð HSÍ eiga þau félög sem senda meistarflokk til keppni að tilkynna tvo landsdómara með hverjum meistaraflokk sem þau senda til keppni

Þau íþróttafélög sem tilkynna þátttöku í landsmótum og í bikarkeppni HSÍ, skulu tilkynna tvo virka landsdómara til starfa fyrir hvern meistaraflokk er það tilkynnir til keppni. Skulu þeir dómarar taka að sér dómgæslu á vegum dómaranefndar, auk eins unglingadómara og A - stigs dómara fyrir hvern annan flokk sem tilkynntur er til keppni.

Nú við lokaundirbúning okkar dómara fyrir næsta keppnistímabil hafa 35 landsdómarar verið skráðir og þar af 7 nýliðar.  Af þessum 35 eru nokkrir meiddir eða nýkomnir úr meiðslum eða aðgerðum og ekki tilbúnir til að dæma strax og því ekki hægt að telja þá virka.  Þetta eru vissulega framfarir fá því í fyrra þegar við vorum með 28 "virka" landsdómara en betur má ef duga skal því samkvæmt reglunum eiga félögin að tilkynna 48 virka dómara miðað við fjölda meistaraflokka sem skráðir eru til keppni.  Félögin eru að standa sig misvel og á meðan til dæmis Fram tilkynnir 8 virka landsdómara þá koma engir dómarar frá Akureyri, Fylki, ÍBV, Selfossi, Stjörnunni og Val.  Þrjú félög, Fjölnir, Fram og ÍR, senda fleiri dómara en þarf á meðan öll önnur félög sinna ekki skyldum sínum gagnvart þessum málum.

Á formannafundi í lok ágúst voru þessi mál rædd og félögunum gerð grein fyrir stöðunni.  Þar var líka lögð fram tillaga frá dómaranefnd  um uppbyggingu og þjálfun dómara.  Sú tillaga gerir ráð fyrir því að félögin sinni sjálf fræðslu á leikreglum og grunnþjálfun dómara með aðstoð HSÍ í formi leiðbeininga og kennslu- og prófaefnis.  Það voru allir sammála um að gera þyrfti átak í þessum málum og að félögin yrðu að sinna þessari uppbyggingu á sama hátt og gagnvart leikmönnum.  Nú vantar bara að fylgja þessu eftir og sýna það ekki bara í orði heldur líka á borði.

Athugasemdir

[Kristján Eldjárn Þorgeirsson, 16.9.2008 kl. 20:05]

Sæll Guðjón!

Ég veit ekki hver ætti að sinna þessu í mínu félagi.  Mér findist nær að starfandi dómarar já og dómaranefnd sinni þessu.  Sé fyrir mér að það væri haldið námskeið hér fyrir austan fjall þar sem menn frá Selfossi og Vestmannaeyjum gætu nýtt sér,  Það mætti hittast á Hvolsvelli, miðsvæðis fyrir báða aðila.  Þetta ætti að vera opin námskeið þar sem Jóni Jónssyni eða páli pálssyni, sem hafa áhuga á handbolta en eru ekki leikmenn að starfandi í kringum félögin, gæfist kostur á að vera með á þessum námskeiðum og kanski kynnast þessari skemmtilegu íþrótt sem handbolti er vissulega.  Þetta myndi kanski efla enn frekar þann áhuga sem er nú á handbolta hér á landinu.