Formannafundur dómaranefnda á Norðurlöndum

Um bikarhelgina var haldinn fundur formanna dómaranefnda á Norðurlöndum hér í Reykjavík.  Formenn allra Norðurlandanna mætti fyrir utan formann dönsku nefndarinnar en hann sendi fulltrúa sinn, Bjarne Munk Jensen, sem nýlega tók sæti í TRC (Technical Referee Commitee) á vegum EHF.  Hér er um árlegan fund að ræða þar sem tekin eru fyrir mál sem eru efst á baugi hverju sinni, svo sem túlkun reglna, menntunar- og fræðslumál dómara og eftirlitsmanna, aðbúnaður og umhverfi dómara, dómaraskipti og agamála dómara og eftirlitsmanna.  Þar má nefna meðal annars að Norðurlöndin, fyrir utan Ísland, hafa verið að skiptast á dómurum til að dæma í efstu deildum hvers lands.  Danir hafa að vísu bara gert það þannig að þeir hafa bara sent dómara en dönsku félögin hafa ekki viljað erlenda dómara í sína deildarkeppni.  Við höfum hug á því að taka þátt í þessu samstarfi og ég þykist nokkuð viss um að íslensku félögin vilji taka þátt í því miðað við umræðuna um dómaramál hér á landi á undanförnum dögum, mánuðum og árum.

Hluti af dagskrá fundarins var að samræma störf eftirlitsmanna og tókum við því allir þátt í að fylgjast með bikarleikjunum í meistaraflokki karla og kvenna og fylltum út hefðbundnar eftirlitsskýrslum um mat okkar á frammistöðu dómarana.  Það sem vakti furðu félaga minna á Norðurlöndunum var hegðun starfsmanna á skiptisvæðum í karlaleiknum og undruðust þeir að þetta skyldi látið viðgangast.  Þeir sögðu að þessi framkoma yrði aldrei liðin hjá þeim og það hefði átt að vera búið að gefa amk útilokun á annan bekkinn miðað við framkomu þeirra.  Þetta staðfestir aðeins það sem við höfum verið að berjast við hér á landi og við megum ekki láta deigann síga í þeirri baráttu.

 

Athugasemdir

[Kristján Eldjárn Þorgeirsson, 3.3.2009 kl. 22:01]

En hvað sögðu þessir frændur okkar frá norðurlöndunum um dómgæsluna sem slíka í leiknum?  Mér líst vel á að fá dómara erlendis frá til að dæma hér nokkra leiki og sjá hvernig það kemur út, bara spurningin um hver á að borga fyrir þetta, ekki sanngjart að fara að rukka félögin um hærra gjald fyrir dómgæslu til þess eins að fá hingað erlenda dómara til að dæma. 

[Guðjón L. Sigurðsson (IP-tala skráð) 3.3.2009 kl. 23:26]

Þeir voru þokkalega ánægðir með dómgæsluna að frátaldri bekkjarstjórninni sem þeim fannst setja slæman blett á leikinn.

Fyrirkomulagið varðandi kostnað hefur verið sá að viðkomandi land borgar flugið fyrir sína dómara en viðtökulandið greiðir fyrir uppihald og leikinn þannig að það er í sjálfu sér lítið sem bætist við. Gjaldið sem greitt er fyrir leiki hér á landi er það lægsta á Norðurlöndunum!!