Fjörið byrjar á morgun

Íslandsmótið í N1 deild kvenna hefst á morgun með fjórum leikjum og karlarnir byrja síðan á miðvikudag.  Dómarar hafa fengið langan undirbúning vegna þess hve seint mótin byrja og koma vonandi vel undirbúnir til leiks.  Nú í ár erum við með 20 pör sem er 6 pörum meira en í fyrra en ættum að vera með 24 pör ef öll félög stæðu sig í að útvega dómara. 

Félögin virðast vera að vakna til vitundar um að án dómara verður enginn leikur og eru sum hver að vakna af Þyrnirósarsvefni.  Í fyrra tókst okkur að útskrifa 158 nýja dómara í yngstu flokkum og nú í haust var námskeið fyrir C-stigs dómara (efsta stig) þar sem 8 nýjir dómarar þreyttu próf. 

Það var einnig haldið námskeið fyrir ritara og tímaverði í síðustu viku þar sem mættu 31 frá flestum félögum.  Slík námskeið hafa ekki verið haldin í nokkurn tíma og var orðinn full þörf á því.  Einn 200 leikja tímavörðurinn sem aldrei hafði farið á námskeið og hélt að hann þyrfti nú ekki á því að halda var meira að segja mjög ánægður og uppgötvaði fullt af atriðum sem hann hélt að væru öðruvísi í reglunum.

 Þjálfarafundur var einnig haldinn í gær þar sem mættu 19 þjálfarar og farið var yfir áherslur vetrarins, samskipti dómara og þjálfara/leikmanna og kunnáttu þjálfara á leikreglunum.  Fundurinn tókst vel og kom í ljós að sumir þjálfarar þurfa að skerpa á reglukunnáttu sinni, en enginn þeirra hafði allar 20 spurningarnar réttar og fimm þeirra voru með 15 eða fleiri réttar.  Þetta sannar að þjálfararnir þurfa rétt eins og dómararnir að rifja upp leikreglurnar öðru hvoru en það skal tekið fram að dómarar fara tvisvar á ári í leikreglupróf og þurfa að skila 80% kunnáttu í hvert skipti.

Ég vil óska öllum dómurum velfarnaðar á komandi keppnistímabili og minni á áherslurnar sem við leggjum upp með.  Ég veit að þið eigið eftir að gera fullt af mistökum, rétt eins og leikmennirnir og það er viðurkennt að 5-10 mistök í leik er allt í lagi.  Rifjið upp til hvers þið ætlist af þjálfurum og leikmönnum og til hvers þeir ætlast af ykkur og ef ykkur tekst að framfylgja því þá hef ég engar áhyggjur.